En barco polos fiordos

29 e 30 de xullo de 2017


Comezamos este día subindo a un barco turístico para percorrer os fiordos Aurlandsfjord e o seu ramal Nærøyfjord. Con 29 e 18 km de lonxitude respectivamente, ambos son ramas do gran Sognefjord, de 205 km, o máis longo de Noruega. Estes dous fiordos teñen paredes verticais de 1000 m e son bastante estreitos, variando a súa anchura entre 2 km e 500 m na parte máis angosta. Desde o barco pódese apreciar o fiordo desde o interior, pero nos parecen máis atractivas e espectaculares as vistas que hai desde os miradores situados a maior altura, pois vense os fiordos cunha perspectiva máis amplia que da unha idea do seu enorme tamaño.




Ao dia seguinte visitamos a igrexa de madeira de Borgund, construída en 1180 e que se conservou sen cambios notables. O templo é moi semellante ao de Heddal do que falamos hai uns días, aínda que un pouco mais pequeno.




 
Pórtico principal

Pórtico lateral con leóns nos capiteis

Son moi bonitas as cabezas de dragón botando lume que rematan os tellados, aínda que posiblemente sexan copias feitas no século XVIII.


Ao lado da igrexa medieval están a igrexa nova, vermella e do século XIX, e o campanario exento de madeira do século XIII, que é o único deste tipo que se conserva.


No mesmo día fixemos moitos quilómetros por estrada rodeando fiordos e atravesando portos de montaña por zonas un tanto remotas e pouco poboadas. Tivemos tempo de visitar o glaciar Nigardsbreen, que é unha das varias linguas que baixan de Jostedalsbreen, o maior glaciar da Europa continental.



Comentarios